Paunang Babala sa mambabasa

Sa kabila ng pagsulong ng siyensiya at teknolohiya ay hindi pa rin nawawala ang paniniwala ng mga Pilipino sa mga multo at sa kung anu-ano pang kababalaghan na higit sa pangkaraniwan. Kaya naman patuloy ang pagdami ng mga babasahin at mga palabas sa telebisyon at sinehan ng mga kuwentong tumatalakay sa temang supernatural.

Ang layunin ng pagbuo ng aklat na ito ay hindi lamang para takutin ang mga mambabasang mahilig sa katatakutan—sa kasong ito ay kayo—kundi para lalo ninyong maunawaan ang mga dahilan at mga pinagmulan ng mga kababalaghang hanggang ngayon ay nararanasan pa rin ng marami.

Ang mga kuwentong inyong mababasa ay mula sa iba’t ibang may-akda na magbabahagi ng mga kuwentong kinapapalooban ng mga misteryong mahirap ipaliwanag—ang ilan ay sarili nilang karanasan, ang iba ay ikinuwento sa kanila, at ang iba pa ay galing naman sa pananaliksik o `di kaya’y sa pakikipanayam sa mga taong nakaranas nang makaengkuwentro ng multo, aswang, tiyanak, tikbalang, engkanto, kapre, duwende, at marami pang ibang nilalang na hindi nakikita ng karamihan sa atin.

At para sa mga duda sa katotohanan ng pananatili ng mga ispiritu at iba pang mga kakaibang nilalang sa ating mundo, kayo na ang bahalang humusga kung dapat kayong maniwala o hindi pagkatapos ninyong basahin ang mga kuwento rito. Samantala, lubusin n’yo na ang pagbasa. Sinisiguro naming hindi kayo mabibitin sa katatakutan...